Ediziuns

Ediziuns regularas

Chalender Ladin

Il Chalender Ladin es la broschüra ufficiala da l’UdG cun contribuziuns da tuot gener. La redacziun respunsabla sun Claudia e Pol Clo Nicolay. Il Chalender Ladin cumpara in november e vain vendü per frs. 15.- dals cuvis, dal Chesin Manella a Schlarigna, da las librarias in Engiadina e dal Center Ladin a Zernez.  [ daplü >> ]

Chasa Paterna

La Chasa Paterna es ün’ediziun annuala da texts dad ün autur o ün’autura o lura a basa d’ün tema. Per l’on 2007 ha Göri Klainguti scrit la Chasa Paterna no.126 cun istorgias chatschadriglias suot il titel“Ün pêr baschattas da Marchet Culaischem“. Per l’on 2008 es quai il tema „Impuls“ cun contribuziuns da diversas persunas rumantschas. La Chasa Paterna no. 127 cumpara in mai / gün 2008. Per la promoziun da quist’ediziun less l’UdG organisar arrandschamaints da prelecziuns.
La vendita vain fatta tras il Chesin Manella, tras librarias e tras il Center Ladin a Zernez.

Dun da Nadal

Las redacturas, Antonella Stecher e Natalia Lehner, preparan minch’on per in november il „Dun da Nadal“ cun ün tema special per tuot ils scolars e tuot las scolaras sün territori ladin.
Quist’ediziun es vnala pro’l Chesin Manella, pro las librarias e pro’l Center Ladin, ed a partir dal 2008 eir pro’ls cuvis.

Ediziuns nouvas 2007 / 2008

Per uffants:
    Cudesch: «Tigrin»  da Leta Semadeni

Per creschüts:
    Cudesch: «Il tscharvè vert» da Peider Könz
    «Poesias da chadafö» in rumantsch e tudais-ch da Leta Semadeni

Ediziuns previssas per 2008

Prosmamaing gnarà edit il cudesch cun crimis «La mort a Segl Maria» - 17 istorgias malignas dad Ulrich Knellwolf, 10 tradüttas in vallader e 7 in puter.

Peider Könz ha scrit seis seguond cudesch cul titel «Il Ladin» in qual el descriva sias algordanzas d’üna vita interessanta in blers pajais esters. Quist cudesch gnarà edit in avrigl / mai 2008.

Il terz cudesch, chi gnarà edit dal 2008, es ün cudesch cun istorgias cuortas cul titel «Mumaints» da Fadrina Hofmann. L’ediziun es previssa per avuost / settember.