Purtret

L'Uniun dals Grischs (UdG) es l'organisaziun da lingua e cultura rumantscha per l'Engiadina, Val Müstair e Bravuogn. Seis böt es da promouver e mantgnair la lingua ed ils bains culturals dals Rumantschs Ladins.

L'UdG edischa tanter oter cudeschs, periodics ed otras medias in rumantsch ladin e maina ün lö d'inscunter cun libraria e program d'occurrenzas i'l Chesin Manella a Schlarigna.

L'UdG es organisada sco società ed es ün'uniun affiliada da la Lia Rumantscha, l'organisaziun da tet da las uniuns linguisticas e culturalas rumantschas.

Commember da l'Uniun dals Grischs as dvainta cun approvar seis tschantamaints e cun pajar la contribuziun fixada da la suprastanza. Per quella contribuziun as survain il Chalender Ladin. Commembers pon esser persunas natüralas, famiglias e persunas giuridicas. Commembers collectivs pon esser instituziuns da dret public dal intschess ladin. Persunas natüralas (persunas chi simpatiseschan cun las meras da l'UdG, persunas chi abitan dadour il territori d'acziun da l'UdG) pon eir gnir acceptadas sco commembras ad personam.

Ulteriurs detagls a reguard l'organisaziun da l'Uniun dals Grischs resortan da seis tschantamaints.

 

Dumondas da sustegn

L'Uniun dals Grischs spordscha sustegn finanzial per progets chi promouvan lingua e cultura rumantscha. Premissas sun:

  • clera colliaziun cun la lingua rumantscha
  • la dumonda sto esser documentada cun descripziun detagliada e preventiv
  • il sustegn finanzial maximal es frs. 500.--
  • termins per inoltrar las dumondas sun fin marz, fin lügl e fin november

Dumondas sun dad inoltrar per scrit a l'UdG:
Uniun dals Grischs, Straglia da sar Josef, 7505 Schlarigna, e-mail: UdG

Infuormaziuns da la presidenta da l'Uniun dals Grischs, e-mail: Annalea Stuppan