Actualiteds - Actualitats
Uossa daja ün Grüflun rumantsch
Bod mincha uffant cugnuoscha al «Grüffelo». Uossa daja l'istorgia dal monster tamberl e la mürina furbazza eir in vallader e puter ed ha nom «Grüflun».
«La mür va a spass tras il god be suletta, qua cloma la vuolp: Mürina, ö spetta!» Ma la vuolp es il plü pitschen problem da la mürina parderta. Ella inscuntra a la tschuetta, a la serp, ed … O na, al Grüflun!
Grüflun es ün monster cun griflunas e tschattas grondas, cun daintüffels ed ögls gelgs. Mo temma nun han ils uffants da quist s-cherpun. L'incuntrari: Sün tuot il muond vain Grüflun amà dals pitschens. L'istorgia da pops da l'autura inglaisa Julia Donaldson e dal illustratur tudais-ch Axel Scheffler es dvantà ün classiker da la litteratura d'uffants daspö cha «The Gruffalo» es cumparü dal 1999 in inglais.