Suprastanza

Gianna Duschletta - Co-presidenta: 

Eau sun magistra da s-chelin ot, autura, slammedra, S-chanfringra, insömgedra… Che chapita scha s‘unescha tuot quistas paschiuns? Lura s‘ho la persuna chi organisescha il Poetry Slam Ladin, chi respuonda a voss mails, chi maina la cumischiun linguistica dals dicziunaris ladins, e chi rapreschainta l‘UdG illa suprastanza da la Lia Rumantscha.

Carmen Baumann - Co-Presidenta: 

Eau sun respunsabla per nossa cumparsa da la pagina d'internet e per noss Instagram. In cuort: Eau saregia quella chi'd es suvenz vi dal telefonin düraunt nossas occurrenzas – per lavur s'inclegia! Eau sun quella da la suprastanza giò illa diaspora, a Turich. La lingua m'occupescha eir in mia vita quotitidauna: Eau sun editura da cudeschs tar Digitec Galaxus. Che cha que voulo dir? Eau leg cudeschs e scriv üna rezensiun, fatsch intervistas e dun ün sguard davous las culissas da la branscha - ün sömmi!

Jon Duri Pult - Chaschier: 

Eu sun uriund da Ftan e stun cun mia famiglia a Samedan. Davo il giarsunadi da comerzi a Zuoz suna stat tschinch ons a Turich per lavur e scolaziun. Daspö il 2016 suna darcheu in patria e lavur sco fiduziari a San Murezzan. Eu m’allegr da m’ingaschar illa suprastanza da l’UdG per nossa lingua.

Fadrina Hofmann - Assessura: 

Eu n'ha stübgià scienzas da media e comunicaziun, schurnalissem e rumantsch e n'ha lavurà per diversas gazettas. Actualmaing suna redactura pella Engadiner Post/Posta Ladina. Illa val vegna nomnada cun ün surrier "die rasende Reporterin". Mia paschiun pella litteratura possa viver oura pro l’Uniun dals Grischs cun realisar la «Chasa Paterna» ed otras ediziuns. Eu viv cun teenies, chan, giat, chucalins da mar e tartaruga a Scuol.

Valentina Parolini - Actuara

Dapü chi gira e meglder esa. Saja que tar la lavur u i’l temp liber. Perque am chattais suvenz dadour illas muntagnas, süls skis da passlung u sün ün palc da teater. E scha nu d’he liber, lura suni a scoula a Samedan ed instruesch plain plaschair il s-chelin ot. L’amur per la lingua e cultura rumauntscha m’haun mno darcho inavous in Engiadina. Plain energia e motivaziun m’imgaschi per l’UdG inua cha sun respunsabla pel Dun da Nadel, il Newsletter e la coordinaziun dal Chalender Ladin. Eau m'allegr da tuot que chi tegna in vita nossa lingua e cultura.